வல்லான்- விமர்சனம்

யார் அந்தக் கொலைகாரன்? என்ற கேள்வியோடு துவங்கும் படங்கள் பெரும்பாலும் நிமிர்ந்து உட்கார வைக்கும். இந்த வல்லானும் அதைச் சாதித்துள்ளார்

ஒரு கோடீஸ்வரர் கொல்லப்படுகிறார். சஸ்பெண்ட் செய்யப்பட்டுள்ள காவல் அதிகாரி சுந்தர் சி அன்அபிஷியலாக அதை விசாரிக்கிறார். அந்த விசாரணைக்குள் அவரின் தனிப்பட்ட வாழ்வின் இழப்புகளும் சம்பந்தப்படுகிறது. அதன் பின் கொலை கொலைகளாக மாறியுள்ள உண்மை தெரியவர, எதிர்பார்க்காத ட்விஸ்ட் ஒன்றோடு படம் நிறைவை எட்டுகிறது. ஒரு திரில்லர் படத்தின் கதையை இதற்கு மேல் சொல்லக்கூடாது

இயக்குநராக சிகரம் தொட்ட சுந்தர் சி நடிகராகவும் சோடை போகவில்லை. சில மெச்சூர்ட் ஆன காதல் காட்சிகளில் நன்றாகவே நடித்துள்ளார். தான்யா ஹோப், அழகாய் இருப்பது போலவே அழகாக நடித்துள்ளார். வில்லன் கேரக்டருக்கு எவ்வளவு அழுத்தமான ரைட்டிங் கொடுக்கப்பட்டுள்ளதோ, அதேபோல் நடிக்கவும் வைக்கப்பட்டுள்ளது..நடிகர்களின் நல்ல பங்களிப்பிலே படம் பாதிக்கிணற்றை தாண்டி விடுகிறது

படத்தின் விஷுவலுக்கு நம்பிக்கையான உத்திரவாதத்தை தன் அழகான ப்ரேம்கள் மூலமாக தந்துள்ளார் ஒளிப்பதிவாளர். இசை அமைப்பாளர் விண்டேஜ் ஸ்டைலில் உள்ள ஒரு காதல் பாடலில் கவனம் ஈர்க்கிறார். பின்னணி இசையிலும் தனிக்கவனம் செய்துள்ளார் பாராட்டுக்கள்

படத்தின் இயக்குநர் மணிசேயோன் ஸ்க்ரீன்ப்ளே ரைட்டராக பல இடங்களில் முத்திரைப்பதிக்கிறார். குறிப்பாக க்ளைமாக்ஸ் ட்விஸ்ட். சர்வ நிச்சயமாக யாரும் கெஸ் பண்ண முடியாது. ட்ரஸ்ட் மூலமாக நடைபெறும் வர்த்தகமும், உண்மைக்கும் அன்புக்கும் இடையிலுள்ள போராட்டமும் படத்தில் டீட்டைலாகச் சொல்லப்பட்டுள்ளது. படத்தின் ஆன்மாவான ஒரு போர்ஷனை சுந்தர் சி கதையோடு முடிவில் இணைத்த விதம் க்ளாசிக். இந்த வார இறுதியை ஒரு நல்ல திரில்லரோடு கழிக்க விரும்பினால், உறுதியாக வல்லானை தேர்ந்தெடுக்கலாம்

வல்லான்-வெல்வான்
3.75/5
-வெண்பா தமிழ்