மருந்து கொள்ளையர்களை கண்டுபுடிக்கத் துடிக்கும் நாயகனுக்கு ..வில்லன்களால் வாழ்வதற்கே சவாலான சூழல் வருகிறது. அந்தச் சூழலைத் தாண்டி எப்படி கொள்ளையர்களை வென்றான் என்பதே வாட்ச் படத்தின் கதை
மருத்துவக் கொள்ளை என்பது இந்த உலகத்தை அச்சுறுத்தும் ஒன்று. அந்தப்பின்னணியில் நிறைய படங்கள் வந்திருந்தாலும், இந்தப்படத்தில் தலைமைப் பாத்திரம் வித்தியாசமான சவாலை எதிர்கொள்வதால் படம் சின்னதாக தனித்துவம் பெறுகிறது
நாயகன் கிரிஷ் கதையின் நாயகனாக ஓரளவு நல்ல நடிப்பை கொடுத்துள்ளார். போலி மருந்து வியாபாரிகளை அவர் நெருங்கும் காட்சிகள் நன்றாகவே இருக்கின்றன. சப்ரினா ஆலம் மாறுபட்ட வேடத்தில் நம்மை ஈர்க்க முயற்சித்துள்ளார். மேத்யூ வர்கீஸ் உதயகுமார் உள்பட படத்தில் நடித்துள்ள அனைவருமே நல்ல நடிப்பை கொடுத்துள்ளார்கள்.
முகமது அமீன், விக்னேஷ் வாசு, இனிய கதிரவன், கலைச்செல்வன் ஆகிய நால்வரின் ஒளிப்பதிவும் படத்தின் கதையோட்டத்திற்கு உதவி செய்துள்ளது. பாடல்களில் செலுத்திய கவனத்தை இசை அமைப்பாளர் சுகன்யன் சுந்தரேஸ்வரன் பின்னணி இசையிலும் செலுத்தியிருக்கலாம்
புதிதாக சில ஐடியாக்களை திரைக்கதையில் நுழைத்துள்ள இயக்குநர் விஜய் அசோகன், இன்னும் சற்று முனைப்பு காட்டியிருந்தால் இந்த வாட்ச்-க்கு நேரம் நல்லாருந்திருக்கும். இப்போதும் வாட்ச் ஒண்டைம் வாட்சிங் என்றளவில் தப்பிக்கிறது
2.75/5
-மு.ஜெகன் கவிராஜ்