சின்னச் சின்ன திருட்டுகளை நடத்தும் ஹீரோ & ஹீரோ நண்பன் திடீரென கடத்தல்காரர்களாக மாறினால் என்னென்ன விளைவுகள் வரும் என்பதே வா வர்லாம் வா.
வயித்துக்கு திருட்டு, அதுதான் பொருட்டு என வாழ்வை உருட்டிக்கொண்டிருக்கும் ஹீரோவிற்கும் அவர் நண்பன் கிங்ஸ்ட்லிக்கும் ஒரு பஸ்ஸை கடத்தும் சூழல் வருகிறது. பணத்திற்காக அதைச் செய்கிறார்கள்..அந்தப் பஸ்ஸில் பள்ளிக்குழந்தைகளும், இரு இளம்பெண்களும் இருக்கிறார்கள். இவர்களை பிணையக் கைதிகள் போல் வைத்து ஹீரோ காரியம் சாதித்தாரா? என்பது படத்தின் மிச்சசொச்ச திரைக்கதையாக விரிகிறது
பிக்பாஸ் புகழ் பாலாஜி முருகதாஸ் நல்ல நடிப்பையும் சிறந்த நடனத்தையும் வழங்கியுள்ளார். கிட்டத்தட்ட இரண்டாம் ஹீரோ லெவலில் வரும் கிங்ஸ்ட்லி அவ்வப்போது நல்ல நல்ல பன்ச்கள் அடித்துச் சிரிக்க வைக்கிறார். ஹீரோயின் மஹானா சஞ்சீவ் கொடுத்த வேலையை குறைவின்றிச் செய்துள்ளார். மைம்கோபி மினிமம் கியாரண்டி வில்லன் போல.. தன் இருப்பை நிவர்த்திச் செய்கிறார். சரவண சுப்பையா, பயில்வான் ரங்கநாதன் உள்ளிட்ட படத்தில் உள்ள அனைத்து நடிகர்களும் தங்கள் பணியைச் செவ்வனே செய்துள்ளனர்
தேனிசைத்தென்றல் தேவாவின் இசையில் இரு பாடல்கள் ரிப்பீட் மோட். கதையின் தன்மை உணர்ந்த பின்னணி இசையும் படத்திற்குப் பலம் சேர்க்கிறது. நேர்த்தியான ஒளிப்பதிவு, ஷார்ப்பான எடிட்டிங் என டெக்னிக்கல் டீமும் படத்தின் தரத்திற்கு உதவியுள்ளன.
ஈசியாக ரீச் ஆகக்கூடிய ஒரு கதையை கையில் எடுத்துள்ளனர் இயக்குநர் L.G.ரவிச்சந்தரும், படத்தின் தயாரிப்பாளரும் இன்னொரு இயக்குநருமான எஸ்.பி.ஆரும். இண்டெர்ஸ்டிங்கான ரைட்டிங், மேக்கிங் என அவர்கள் கவனம் ஈர்க்கிறார்கள். எளிமையான லைன் சிலநேரம் வலிமையான வெற்றிக்கு வழி வகுக்கும். அதற்கான முயற்சியைச் சரியாகச் செய்துள்ளது வா வர்லாம் வா படம்
3/5
-மு.ஜெகன் கவிராஜ்