சுந்தரச்சோழருக்கும் நந்தினிக்கும் ரத்த உறவு இருக்கிறதா? என்ற கேள்வியை எழுப்பி, நிஜத்தில் நந்தினி யார்? என்ற தேடுதலில் முனைப்பு பெற்று, பாண்டியர்களின் ஊடுருவலும், மதுராந்தகன் அரியணை ஏற பழுவேட்டையர்கள் நடத்தும் ஆலோசனைகளும் எப்படி முறியடிக்கப்பட்டது? என்ற ஆர்வத்தைத் தூண்டி, ஆதித்ய கரிகாலனாக வரும் விக்ரமின் முடிவு என்ன? என்ற டெம்போவை ஏற்றி இப்படி எல்லா கேள்விகளுக்கும் எல்லோரும் ஏற்றுக்கொள்ளும் படி பதிலளித்தால் அதுதான் PS-2
கோட்டையில் எத்தனை பேர் கொடி வைத்திருந்தாலும் உயரத்தில் பறப்பதும், தூரமாய் வருபவருக்கு தெரிவதும் ஒரே கொடி தான். அது மதிலில் பறக்கும் கொடி..அந்தக் கொடி தான் நடிகர் விக்ரம். ஆதித்த கரிகாலனாக அவர் காட்டியுள்ள நடிப்பு அசுரத்தனம். பெயருக்கே ஏற்ற அந்தக் கம்பீர மனிதனுக்குள் இருக்கும் காதலை வெளிப்படுத்தும் இடம் ஒன்றில் விக்ரம் துவம்சம் செய்துள்ளார். ஆஹா..சபாஷ் சியான்
கார்த்தி தனது ட்ரேட்மார்க் நடிப்பாலும் ஜெயராமை கலாய்க்கும் இடங்களில் கமர்சியல் ஹீரோவாகவும் ஈர்க்கிறார். முந்தைய பாகம் போலவே இந்தப்பாகத்திலும் ஜெயம்ரவிக்கு பெரியவேலையில்லை. அது அவர் குறையுமில்லை. நந்தினியாக வரும் ஐஸ்வர்யா ராய் நடிப்பில் ருத்ரதாண்டவம் ஆடியிருக்கிறார். சரத்குமார் பார்த்திபனை விட அதிக காட்சிகளில் வந்து அசத்தியுள்ளார் பிரகாஷ்ராஜ். குந்தவையான திரிஷா பாச இளவரசியாகவும், சகோதர்களுக்கு நல்ல பாதை வகுக்கும் தந்திரியாகவும் அசத்தியுள்ளார்.
இடமறிந்து இசை வழங்கி காட்சிகளுக்கு கணமேற்றியுள்ளார் ஏ.ஆர் ரகுமான். காதல் காட்சி ஒன்றில் அவர் அமைத்துள்ள பின்னணி இசை வெகுகாலம் முன்னணியில் நிற்கும். ரவி வர்மனின் ஒளிப்பதிவு அழகியல் கம்பீரம் என இரண்டும் கலந்த கலவை.
மணிரத்னம் தான் ஒரு மாஸ்டர் என நிரூபித்துள்ள இடங்கள் படத்தில் நிறைய இருக்கின்றன. குறிப்பாக ஒவ்வொரு கேரக்டர்களுக்கும் அவர் கொடுத்துள்ள பினிஷிங் வேறலெவல். கல்கியின் மூலக்கதையில் இருந்து திரைக்கதை சற்று விலகி இருந்தாலும், அதை அனைவராலும் ஏற்றுக்கொள்ளும் படி செய்ததில் பறக்கிறது மணியின் வெற்றிக்கொடி. முன்பாதியின் ஆழம் நம்மை கவனிக்க வைத்ததைப் போல பின்பாதியின் நீளம் சற்று நெளிய வைத்தது. க்ளைமாக்ஸுக்குப் பின் வரும் சில காட்சிகள் தேவையற்றவை. இவையெல்லாம் மிகச்சிறு குறையே. ஒட்டுமொத்த படமாக பொன்னியின் செல்வன்-2 முதல் பாகத்தை தாண்டி வென்றுள்ளது
3.5/5
-மு.ஜெகன் கவிராஜ்
#PonniyinSelvan2 #பொன்னியின்செல்வன்2