ஒரு வணிக சினிமாவை அதன் வணிகம் குறையாமல் மாற்றுப்பாதையில் அழைத்துச் செல்லும் முயற்சி பாராட்டுக்குரியது. ஒரு டார்க் ஹியூமர் படத்தில் மொழி அரசியல் பேசியிருக்கிறார் இயக்குநர் ரத்னகுமார். மேயாதமான், ஆடை படங்கள் மூலமாக கவனம் ஈர்த்து, மாஸ்டர், விக்ரம் படங்களின் வசனப்பணியில் மாஸ் காட்டியவர். சந்தனாத்தோடு அவர் இறங்கியிருக்கும் இந்தக் குலு குலு என்ன சொல்கிறது?
உலகில் மொத்தம் 700 பேர்களால் மட்டுமே பேசப்படும் மொழியின் வாரிசு சந்தானம். அவரது இனக்குழு அதிகார வர்க்கத்தால் அழிக்கப்பட, நாடுகள் கடந்து தமிழ்நாட்டுக்கு வந்து சேர்கிறார். யார் உதவி என கேட்டாலும் ஓடோடி செய்யும் சந்தானத்திற்கு ஒரு முக்கியமான கமிட்மெண்ட் வருகிறது. அதை அவர் எப்படிச் செய்து கரையேறுகிறார் என்பதே குலுகுலு
சந்தானம் தன் வாழ்வில் ஒரு கவுண்டர் கூட அடிக்காமல் நடித்தபடம் இதுதான். மிக எதார்த்தமாக அந்தக் கேரக்டருக்குள் பொருந்திப் போயிருக்கிறார். அவருடன் நடித்துள்ள ஹரிஷ் உள்பட அனைவருமே தூள் கிளப்பியிருக்கிறார்கள். குறிப்பாக சார்ஜ் & கோ காமெடிகள் அதகளம்
சந்தோஷ் நாராயணனின் பின்னணி இசையும் பாடல்களும் படத்திற்கு பெரு வலு சேர்த்துள்ளது. விஜய் கார்த்திக் கண்ணனின் ஒளிப்பதிவு மிரட்டியிருக்கிறது. க்ளைமாக்ஸ் காட்சிகளின் லைட்டிங் விக்ரமை நினைவூட்டியது
படத்தின் துவக்கம் சீராக இருந்தாலும், சிற்சில இடங்களில் படம் ஒரே இடத்தில் சுற்றி சுற்றிவருவதாக இருந்தது. அதற்கெல்லாம் சேர்த்து க்ளைமாக்ஸ் பெரும் எனர்ஜியை தந்துவிடுகிறது.தாய்மொழியின் அவசியத்தை நறுக்கென்று பேசியிருக்கும் குலுகுலு காமெடி+ பொறுப்பு என்ற வகையில் வலு சேர்த்து கரையேறுகிறது
3.5/5
-மு.ஜெகன் கவிராஜ்