ஆணும் பெண்ணும் சமம்..அதை புரிந்துகொண்டால் வாழ்வு சுபம்” என்ற கான்செப்டை வைத்து சிரிக்கச் சிரிக்க படமெடுத்து முடிவில் சிந்திக்கவும் வைத்துள்ளார் இயக்குநர் செல்லா அய்யாவு
நீளமான கூந்தல், நீளாத கல்வி கொண்ட பெண்ணே எனக்கு மனைவியாக வர வேண்டும்,மேலும் தனக்கு கட்டுப்பட்டு தான் அவள் நடக்க வேண்டும் என்பதும் நாயகன் விஷ்ணு விஷாலின் எதிர்பார்ப்பு. யாருக்கும் அஞ்சேன்..தொல்லை என்று வந்தால் தூக்கிப்போட்டு மிதிப்பேன் என்ற கேரக்டர் ஐஸ்வர்யா லட்சுமிக்கு. இப்படி முரணாக இருக்கும் இருவரும் கரம் பிடித்தால் என்னவாகும் இல்லறம்? இதுதான் கட்டா குஸ்தியின் கதை
விஷ்ணு விஷாலுக்கு மிகவும் விசாலமான மனது. மனிதர் எல்லாப் ப்ரேமிலும் நாயகியை ஸ்கோர் செய்யவிட்டு ரசிக்கிறார். இப்படத்தின் மெயின் லீட் நிச்சயமாக ஐஸ்வர்யா லட்சுமி தான். துவண்டு விழும் போதும் சரி, எதிரிகளை தூள் தூளாக நொறுக்கும் போதும் சரி நெருப்பு பறக்கிறது அவர் நடிப்பில். அதுவும் அந்த shot hair-ல் வந்து Air-ல பறந்து அடிப்பதெல்லாம் மாஸ் மாஸ்! எமோஷ்னல் காட்சிகளிலும் தனிக்கொடி நாட்டுகிறார் ஐஸ்வர்யா லட்சுமி. விஷ்ணு விஷால் தனக்கு கிடைக்கும் சின்ன வெளியிலும் அசத்துகிறார். கருணாஸ் வில்லன் கலந்த காமெடி ரோலில் பின்னுகிறார். கருணாஸிடம், “நீ அவங்கம்மாட்ட மட்டுமா வாங்கிக்குடிச்ச.. சின்னம்மாட்ட கூட தான் வாங்கிக்குடிச்ச” என்று பேசும் வசனத்திலிருந்து காளி வெங்கட் அடிக்கும் பன்ச்களில் தியேட்டரில் விசில் பறக்கிறது. முனிஷ்காந்ந் தான் படத்தில் முக்கியமான திருப்புமுனை கேரக்டர். மனிதர் பின்னியிருக்கிறார். ஹரிஷ் பேரடி, ரெடின் கிங்க்ஸ்ட்லி ஆகியோர் உள்பட கேரக்டர்கள் அனைத்துமே நச் தேர்வு. நல்ல நடிப்பு
ஜஸ்டின் பிரபாகரர் இசையில் ஒரு பாடல் செம்மயாக வொர்க்கவுட் ஆகியுள்ளது. பின்னணி இசை எங்குமே எனர்ஜியை குறைக்கவில்லை. படத்தில் ஒளிப்பதிவும் சிறப்பான பதிவு.
பின்பாதியில் பழைய கதை, எளிதாக யூகிக்கக் கூடிய திரைக்கதை தான் என்றாலும் அதை கொஞ்சம் கூட பிசிறில்லாமலும் சோர்வடையச் செய்யாமலும் படத்தை ஜெட்வேகத்தில் கொண்டு போயுள்ளார் இயக்குநர். முக்கியமாக வசனங்களில் அதகளம் செய்துள்ளார். மனைவியை வரமாக எண்ண வேண்டும். வராமல் இருந்தால் நல்லாருக்கும் என்று நினைக்க கூடாது. மனைவி பல இடங்களில் இன்னொரு தாய் என்பதை படம் அட்டகாசமாக பதிவு செய்துள்ளது. இந்த வீக் என்ட்-ஐ அவசியம் கட்டா குஸ்தியோடு கொண்டாடுங்கள். படம் உங்களை துளியும் ஏமாற்றாது
4/5
-மு.ஜெகன் கவிராஜ்