வாழ்வை வெறுத்து வாழும் ஒருவனுக்குள் ஒரு நாய் நிகழ்த்தும் பாசப்போராட்டமே இந்த 777 சார்லி
நாயகன் ரக்ஷித் ஷெட்டி தன் குடும்பத்தை விபத்து ஒன்றில் இழக்கிறார். அதிலிருந்து அவர் மிகுந்த மனவேதனையில் வாழ்ந்து வருகிறார். அப்போது சார்லி என்ற நாய் அவரிடம் வருகிறது. துவக்கத்தில் நாய் மீது வெறுப்பை உமிழும் அவர் ஒரு கட்டத்தில் சார்லியின் உண்மையான அன்பை உணர்ந்து அதன் மீது தானும் அன்பு கொள்கிறார். அன்பும் பேரன்புமாக பயணிக்கும் சார்லிக்கு கேன்சர் இருப்பது தெரியவர ரக்ஷித் ஷெட்டி உடைந்து போகிறார். சார்லிக்கு இருக்கும் ஆசை ஒன்றை நிறைவேற்ற ரக்ஷித் ஷெட்டி முயல்கிறார். அந்த ஆசை ஈடேறியதா..இல்லையா? என்பதே இந்தச் சார்லியின் பயணம்
வெறுப்பையும் அன்பையும் காட்டும் இரண்டு முக நடிப்பு ரக்ஷித் ஷெட்டிக்கு. மிக இயல்பாக நடித்திருக்கிறார். சார்லி தன்னை வாரியணைக்கும் போதெல்லாம் அவர் காட்டும் ரியாக்ஷன்ஸ் வாவ் ரகம். சார்லியாக வரும் அந்த நாய் காட்டும் மேனரிசங்கள் எல்லாமே ஆசம். நாயகனுக்கு தன் குடும்பம் பற்றிய நினைவு வரும்போதெல்லாம் சார்லி அவரை ஆற்றுப்படுத்துகிறது. அந்தக் காட்சிகள் அனைத்தும் அன்பின் தரிசனம்
படத்தில் குறிப்பிடத்தக்க அம்சம் ஒளிப்பதிவு. அரவிந்த் காஷ்யப் அசத்தி இருக்கிறார். பின்னணி இசையும் பாடல்களும் ஓரளவு ஈர்க்கின்றன. படத்தில் கன்னட வசனங்களை தமிழ்ப்படுத்தியிருந்தாலும் பெரிதாக உறுத்தவில்லை. உணர்வுகளை கடத்துவதற்கு மொழி முக்கியமில்லை என்பதை ஸ்ட்ராங்காக நிரூபித்திருக்கிறது இந்த 777 சார்லி!
படத்தில் முத்தாய்ப்பாக மிருகங்களுக்கு செயற்கையான உடல் செழிப்பை உண்டாக்காதீர்கள் என்ற மெசேஜ் அட்டகாசம். இந்த Week end-ல் சார்லியை கொண்டாடுவோம்
மு.ஜெகன் கவிராஜ்