டெஸ்ட்- விமர்சனம்

குடும்ப பாசம், லட்சியம், தேசப்பற்று, குழந்தை எமோஷ்னல் ஆகியவற்றுக்குள் நடக்கும் மேட்ச் தான் இந்த டெஸ்ட்

சித்தார்த் இந்தியாவின் புகழ்பெற்ற டெஸ்ட் கிரிக்கெட் வீரர். கிரிக்கெட் நிர்வாகம் இந்தமுறை அவரை மாற்ற முயற்சிக்கிறது. அவர் அதனை எதிர்த்து விளையாடியே தீருவேன் என்கிறார். நயன்தராவிற்கு ஒரு டீச்சர் வேடம். தனக்கு ஒரு குழந்தை வேண்டும் என்று தீவிர வேட்கையில் இருக்கிறார். நயனின் கணவன் மாதவன் வாகனங்களை பெட்ரோல் குறைவாக வைத்து இயக்கும் கருவி ஒன்றை கண்டுபிடித்து, அதற்கு அரசின் அப்ரூவல் வாங்க முயற்சிக்கிறார். இவர்கள் மூவரின் முயற்சிகளுக்கும் தடையாக ஒரு வில்லன் டீம் கதைக்குள் வருகிறது. அதன்பின் என்ன நடக்கிறது? என்பதே டெஸ்ட் மேட்ச்சின் முடிவு

சில காட்சிகளில் மாதவன் தானொரு நடிப்பு அசுரன் என நிரூபித்துள்ளார். மிகச்சிறந்த நடிப்பு. குறிப்பாக தன் ஈகோ சீண்டப்படும் போதெல்லாம் அவர் காட்டும் பெர்பாமன்ஸ் வெறித்தனம்..சித்தார்த் ப்ரஷர் நிரம்பிய முகத்தோடு திரிகிறார். கொடுக்கப்பட்ட வேலையை திறம்படச் செய்துள்ளார். நயன்தாரா குறையொன்றுமின்றி தன் பங்களிப்பைச் செய்துள்ளார். ஏனைய நடிகர்களில், மீரா ஜாஸ்மின், முருகதாஸ் உள்பட அனைவரும் நடிப்பில் குறை வைக்கவில்லை.

விராஜ் சிங் கோஹில் ஒளிப்பதிவை திறம்பட கையாண்டுள்ளார். கிரிக்கெட் கிரவுண்ட் காட்சிகளைச் சிறப்பாக சமாளித்துள்ளார். பின்னணி இசையால் கதையில் அழுத்தம் கூட்டியுள்ளார் இசை அமைப்பாளர் சக்திஸ்ரீ கோபாலன்.

படத்தின் துவக்கம் மூவருக்கும் ஒவ்வொரு இலக்கு என்ற தெளிவோடு அமைந்துள்ளது. சித்தார்த், நயன், மாதவன் ஆகியோரை இணைக்கும் ஒற்றைப்புள்ளி இடைவேளை கூட இன்ட்ரெஸ்டிங். But பின்பாதி திரைக்கதையில் எந்த எமோஷ்னலும் எடுபடவில்லை. கதையில் யாரையும் பின் தொடர முடியவில்லை. இடைவேளைக்குப் பின் D20 ஆடியிருக்க வேண்டிய படம் டெஸ்ட் மேட்ச் போல சவசவத்ததால் படம் முழு நிறைவைத் தரவில்லை
2.75/5
-வெண்பா தமிழ்